E ardhmja e Neymar duket se është gjithmonë dhe më larg Parisit. Ylli brazilian duket se po e merr gjithmonë e më shumë në konsideratë idenë për t’u larguar nga Paris Saint-Germain pasi ka zbuluar se klubi do të ishte i lumtur për një lamtumirë të tijën.

Sipas ESPN, menaxherët e O’Ney kanë nisur që tani kontaktet me Chelsea-n, një nga klubet e pakët të mëdha që janë në gjendje të përballojnë kostot e këtij operacioni, për shkak të dëshirës së pronarit të ri, Todd Boehly, që të bëjë një goditje të madhe në merkaton e kësaj vere.

Megjithatë, mbetet të shihet nëse Chelsea dhe Thomas Tuchel do të duan me të vërtetë ta kenë në organikën e skuadrës lojtarin brazilian.

Në rast se do të jetë kështu, atëherë mund të hapet një negociatë e bujshme për transferimin e Neymar-it nga Parisi në Londër.

Statistikat e regjistruara nga O’Ney sezonin e kaluar nuk kanë qenë shumë mbresëlënëse, me 13 gola të shënuar dhe tetë asiste të dhënë në 28 ndeshje të luajtura në të gjitha kompeticionet me PSG.