Ka nisur edicioni i tretë i Ligës Unike në basketboll për femra, turneu mbarëkombëtar që organizohet mes ekipeve më të mira nga Shqipëria e Kosova. Starti i këtij edicioni ka qenë me surpriza.
Partizani kampion në fuqi u mund në Tiranë me rezultatin e ngushtë 65-63 nga Prishtina mike. Një ndeshje e ekuilibruar deri në fund, vendosur në favor të mikeve nga Williams (15 pikë e 12 rebound).
Gjithsesi, shënuesja më e mirë për kosovaret ishte Johnson, autore e 31 pikëve, ndërsa te Partizani mungoi lojtarja-lidere (Mala me 16 pikë shënuesja më e mirë).
Me humbje e nis këtë turne edhe Flamurtari kampion i Shqipërisë, që u mund në Kosovë 88-61 nga Bashkimi. Takim i komanduar nga vendaset, ku u dallua Godbold me 26 pikë e 12 rebound.
Liga Unike-Femra (java e parë)
Partizani – Prishtina, 63-65
Bashkimi – Flamurtari, 88-61
Tirana – Penza, 24 janar
Renditja: Bashkimi 2 pikë, Prishtina 2 pikë, Partizani 1 pikë, Flamurtari 1 pikë, Tirana 0 pikë, Penza 0 pikë.