Tani është zyrtare, ose pothuajse: marrëdhënia midis Bayernit dhe Jerome Boateng do të marrë fund. Edhe pak muaj dhe do të vijë ndarja. Të gjitha konfirmohen nga drejtori sportiv i bavarezëve, Hasan Salihamidzic: “Kontrata e Jerome skadon verën e ardhshme, ajo nuk do të zgjatet”.
Me pak fjalë, ajo që shumë kishin kuptuar për disa kohë do të bëhet realitet. Duke filluar nga 1 korriku, Boateng do të jetë në fakt një lojtar i lirë, do të zgjedhë vetë ekipin për të cilin do të luajë në sezonin e ardhshëm.
Ish-mbrojtësi i Manchester City, i cili mbërriti në Mynih në verën e 2011, largohet me një “palmares” mbresëlënës, ku përfshihet Liga e Kampionëve 2013 dhe 2020. Me ëndrrën, sigurisht, për të fituar një të tretën në Stamboll.
Prandaj është e nevojshme të kuptohet se kush do të ketë dëshirën dhe aftësinë t’i fitojë shërbimet e Boateng, gjithmonë një qendërmbrojtës i vlefshëm, edhe nëse nuk është më shumë i ri. Në shtator, gjermani, vëllai i Kevin-Prince, do të mbushë 33 vjeç. Ndërkohë, Bayerni tashmë ka rezervuar Dayot Upamecano të Leipzig për ta zëvendësuar atë.
Boateng nuk do të jetë i vetmi që do të largohet nga Bayerni, pas 30 qershorit. Përveç tij, David Alaba, mbi të cilin Real Madridi vazhdon të punojë, dhe Javi Martinez, do të ndryshojnë skuadra.