Borussia Dortmund dhe Lazio do të përballen të mërkurën në mbrëmje në Champions League dhe në Gjermani janë të sigurt se verdhezinjtë do ta fitojnë ndeshjen për 5 arsye.

Arsyeja e parë, sipas faqes së Bundesliga-s, është se Haaland është më i fortë se Immobile. Arsyeja e dytë ka të bëjë me paraqitjet e Jadon Sancho, që nuk e ka nisur shumë mirë sezonin, por që shkëlqen gjithmonë në Champions.

Arsyeja e tretë ka të bëjë me diferencën e moshës mes dy skuadrave dhe, për rrjedhojë, freskinë e lojtarëve. Borussia, në fakt, përveç dy të lartpërmendrve, ka në ekip edhe talentet Reyna, Moukoko dhe Bellingham, lojtarë që po shkëlqejnë.

Më pas është arsyeja e katërt, ajo ndoshta më e rëndësishmja në një fushë futbolli: dëshira për revansh. Haaland me shokë nuk duhet të reagojnë vetëm për humbjen e pësuar në Olimpico, por edhe për atë të pësuar në kampionat kundër Koln-it.

Në fund, Bundesliga ka analizuar paraqitjet në mbrojtje të dy skuadrave në ndeshjet e fundit të Champions League. Pas humbjes në fushën e Lazio-s, Dortmund nuk ka pësuar gol në tri ndeshje radhazi.

Problemi është se gjermanët kishin bërë një parashikim të tillë edhe për ndeshjen e parë, të fituar 3-1 nga Strakosha me shokë.