Sipas prestigjiozes zvicerane “Blick”, pas Eman Kospo dhe Leon Avdullahu, tani edhe Albian Hajdari ka vendosur të ndryshojë kombëtare. Mbrojtësi 22-vjeçar i TSG Hoffenheim, me vlerë rreth 12 milionë franga (sipas Transfermarkt), do të përfaqësojë Kosovën, jo më Zvicrën. Hajdari shihej prej kohësh si lojtar shumë premtues për futbollin zviceran.
Ai ka kaluar në të gjitha grupmoshat e kombëtareve të Zvicrës, është thirrur disa herë nga Murat Yakin në ekipin A (kualifikueset e “Euro 2024”, “Nations League” kundër Serbisë e Spanjës, ndeshjet miqësore me Irlandën e Veriut dhe Luksemburgun), madje debutoi kundër Luksemburgut. Por, si miqësore që ishte, dera për Kosovën mbeti e hapur, një mundësi që presidenti i FFK-së, Agim Ademi, e shfrytëzoi në mënyrë perfekte, duke arritur një tjetër sukses.
Për Hajdarin, ky hap është edhe një mundësi sportive. Pas dëmtimit të kapitenit Amir Rrahmani, ai pritet të ketë shanse të mëdha për titullar në kualifikueset e Botërorit kundër Sllovenisë dhe Suedisë. Te Zvicra, ndërkohë, konkurrenca ishte shumë më e madhe, me emra si Akanji, Elvedi, Amenda dhe së fundi Gartenmann.
Ndërsa në Prishtinë festohet, Federata Zvicerane mbetet edhe një herë bosh. Drejtori i kombëtares, Pierluigi Tami, në shtator thoshte se nuk kishte “asnjë shqetësim” për një largim të mundshëm të Hajdarit, por tashmë edhe një talent tjetër është humbur.
