Një fatkeqësi e keqe për Roberto Baggio dhe familjen e tij. Siç raporton “Corriere del Veneto”, fituesi i “Topit të Artë” të vitit 1993 dhe familja e tij ishin viktima të një grabitjeje të dhunshme mbrëmjen e së enjtes, teksa po shijonin Spanjë-Itali, ndeshje e vlefshme për xhiron e dytë të Grupit B të “Euro 2024”. Banda prej të paktën 5 personash, të gjithë të armatosur, hynë në vilën e ish-futbollistit në Altavilla Vicentina.

“Bishtaleci Hyjnor” u përpoq të luftonte një nga grabitësit, por u godit me kondakun e armës pas një lufte shumë të shkurtër, e cila i shkaktoi një plagë të thellë. Ish-lojtari i Juventusit, Interit, Fiorentinës dhe Bologna u mbyll së bashku me familjen brenda një dhome, ndërsa kriminelët përmbysën shtëpinë dhe vodhën ora, bizhuteri e para. Plaçka e grabitur nuk është përcaktuar ende.

“Fillimisht, unë dhe familja ime dëshirojmë t’i falënderojmë të gjithë për dashurinë e madhe që kemi marrë. Faleminderit shumë”. Këto janë fjalët e para që Roberto Baggio lëshoi ​​për ANSA përmes menaxherit të tij historik, Vittorio Petrone. “Në rrethana të ngjashme, – vazhdoi Baggio, – çdo gjë mund të ndodhë. Për fat të mirë dhuna që pësova shkaktoi vetëm disa qepje në personin tim, mavijosje dhe shumë frikë. Tani mbetet vetëm të kapërcejmë frikën”.