I intervistuar nga kanalet zyrtare të FIFA-s, ish-sulmuesi i Manchester City, Sergio Aguero, komentoi situatën te “qytetarët”: “Për mua, Guardiola është çelësi i Manchester City, edhe pse lojtarët janë gjithmonë të fokusuar te fitorja në atë klub.

Duhet t’i heqim kapelen trajnerit, sepse nuk është e lehtë të vazhdosh gjithmonë në krye të gjërave. Lojtarët, veçanërisht ata që janë te City, më thonë se çfarë iu thotë përditë Guardiola: Forca, forca, ne duhet vetëm të fitojmë.

Pep nuk pushon kurrë, ai tashmë po mendon për tri ndeshjet e ardhshme, ka gjithçka të planifikuar në kokën e tij. Për shembull, një herë e pyeta për një ekip të caktuar dhe ai m‘u përgjigj: Tashmë e kam gjithçka në kokën time.

Më befasoi, sepse ndeshja kundër asaj skuadre ishte ende dy javë larg. Ai dëshiron të fitojë, lëndohet shumë kur humbet. Ai do të bëjë gjithçka që është e mundur për të siguruar që City të vazhdojë të jetë favorit në të gjitha kompeticionet ku merr pjesë”.