Miralem Pjanic ka sulmuar Maurizio Sarri, duke thënë se ish-trajneri i Juventusit nuk u besonte lojtarëve të tij dhe vuri në dyshim profesionalizmin e tyre. Eksperienca e Sarrit zgjati vetëm një sezon në Torino. Edhe pse fitoi titullin kampion, i nënti radhazi në Serie A për bardhezinjtë, ai u shkarkua, pasi u eliminua nga Liga e Kampionëve që në 1/8 finale, përballë Lyon.
Pjanic u transferua te Barcelona dhe mund të bëjë sot debutimin e tij në “El Clasico”. Sidoqoftë, përvoja me Sarrin mbetet dhe analizohet. “Ajo për të cilën unë ende pendohem është se Sarri nuk iu besoi lojtarëve, gjë që më shqetësoi dhe mua, – tha Pjanic për “Tuttosport”. – Është turp kur i vlerëson njerëzit gabim. Çdo lojtar në atë dhomë zhveshjeje, gjithmonë ka dhënë dhe do të japë më të mirën për klubin dhe ekipin.
Ju mund të mos merreni vesh me një ose dy lojtarë, por kjo kurrë nuk do të ndikojë në angazhimin e tyre, sepse çdo lojtar dëshiron të fitojë. Te Juventusi ka profesionistë të pabesueshëm, që duan të ndjekin qëllimin e tyre. Epo, nëse trajneri e vë në dyshim këtë, atëherë ajo shkëndijë për të cilën flet presidenti, nuk ndodh. Askush nuk dyshon në cilësitë e Sarrit si trajner, por ekzistonte ky problem. Sidoqoftë, në fund ne fituam një titull tjetër, që nuk është kurrë diçka për t’u marrë si e mirëqenë”.
Kur u zhvendos nga Juve te Barça, Pjanic u bë një nga disa futbollistë të zgjedhur, që kanë luajtur së bashku me Cristiano Ronaldo dhe Lionel Messi. “E pabesueshme, – thotë ai për këtë fakt. – Në kuptimin më të vërtetë të fjalës, sepse për disa vjet, kur ata do të dalin në pension, ne do të kuptojmë se çfarë objektivash kanë arritur, në çfarë niveli ka qenë futbolli i tyre, çfarë lloj kampionësh të paarritshëm janë”.
Gjatë verës, Juventus ishte gjithashtu i interesuar për të blerë shokun e ekipit kombëtar të Pjanic, Edin Dzeko, por marrëveshja përfundimisht u rrëzua, ndërsa transferuan Alvaro Morata në vend të bomberit boshnjak. “Do të ishte një kënaqësi të shihja një boshnjak tjetër te Juve, pas meje, – nënvizoi Pjanic. – E di që ishin shumë afër marrëveshjes, isha në kontakt me Edin. Unë i shpjegova atij se si ishte Juventusi, ku po shkonte klubi. Nuk e di saktësisht se çfarë ka ndodhur në fund, nuk është shqetësimi im”.
