Katër vite pas vdekjes së Diego Armando Maradonës, procesi për të hedhur dritë mbi shkaqet e ndarjes nga jeta të legjendës argjentinase të futbollit po bëhet gjithnjë e më kompleks. Sipas asaj që raporton “Diario Olé”, procedimi, i klasifikuar si “vrasje me paramendim për shkak të mundësisë së qëllimit”, përfshin tetë të pandehur:

Leopoldo Luque, neurokirurg.

Agustina Cosachov, psikiatre.

Carlos Ángel Díaz, psikolog.

Nancy Edith Forlini, doktoreshë.

Infermierët Gisella Dahiana Madrid dhe Ricardo Omar Almirón.

Shefi i tyre, Mariano Perroni.

Mjeku klinik Pedro Pablo Di Spagna.

Maradona, i cili ndërroi jetë gjatë javës së tretë të rehabilitimit, pas operacionit për një hematomë subdurale, dyshohet se ishte viktimë e kujdesit shëndetësor të cilësuar si “i mangët, i pakujdesshëm dhe indiferent”, gjatë qëndrimit të tij në shtëpi. Prokuroria e San Isidros konkludoi se ndihma e ofruar nga profesionistët e përfshirë ishte e papërshtatshme, duke e çuar çështjen përpara Gjykatës Penale Orale (TOC) nr.3 të San Isidros.

Mes ankimimeve dhe kërkesave nga mbrojtja, çështja është komplikuar edhe më shumë. Avokati i infermieres Gisella Madrid kërkoi që klientja e tij të gjykohej në një procedim të ndarë, me jurinë popullore. Si pasojë, janë programuar dy procese të veçanta: Proces teknik për shtatë të pandehurit e tjerë dhe proces i veçantë për Gisella Madrid.

Pavarësisht kërkesave për shtyrje, gjyqtarja María Coello vendosi të vazhdojë me seancat paraprake për çështjen e Madrid. Megjithatë, katër prej këtyre seancave tashmë kanë dështuar për shkak të mungesës së një marrëveshjeje mes palëve mbi provat.

Kompleksiteti ligjor dhe ndërlikimi i ankimimeve kanë kontribuar në zgjerimin e çështjes, duke ngadalësuar procesin e zbulimit të së vërtetës për vdekjen e Maradonës. Ndërsa procesi vazhdon në një rrugë të ndarë, vëmendja mbetet e lartë, me shpresën që të zbardhen përgjegjësitë që çuan në humbjen e njërës prej legjendave më të mëdha të futbollit botëror.