Sulmuesi i Milanit, Christian Pulisic, është i zënë këto ditë me SHBA. Që nga grumbullimi me ekipin kombëtar, ish-lojtari i Chelsea foli në një konferencë shtypi, duke prekur tema që kanë të bëjnë me kuqezinjtë, duke filluar nga fitorja 3-1 kundër Real Madridit në “Santiago Bernabeu”, në Champions League.

Suksesi i Milanit ndaj Real Madridit bëri që bota të flasë për ju, si e përjetuat atë triumf në rolin e protagonistit?
Jam përballur 8 herë në karrierën time me Real Madridin, një numër i çmendur në Champions League. Ndeshja e fundit ishte një përpjekje e jashtëzakonshme nga skuadra, bashkëkombësi im Musah luajti një rol themelor në ndeshje dhe të gjithë e panë rëndësinë e tij. Për ekipin në përgjithësi ishte e veçantë të shkonte dhe të fitonte në një stadium si “Bernabeu”.

Si po shkon përvoja juaj në Milano në përgjithësi dhe cili aspekt i klubit ju pëlqen më shumë?
Pjesa më e mirë e të qenit në Milano është të luash në “San Siro”, ku ka një atmosferë të veçantë. Është një stadium i jashtëzakonshëm për të luajtur, shumë stimulues. Të gjitha skuadrat përgatiten në një mënyrë të veçantë për ta sfiduar Milanin aty dhe kjo e bën stadiumin më shumë të veçantë.