Me tri fitore në katër ndeshjet e para të Champions League, skuadra e Borussia Dortmund ka një pozicion të mirë në renditje. Gjermanët do të luajnë sot në mbrëmje ndaj Dinamo Zagreb.

Një përballje delikate për skuadrën e trajnerit Nuri Sahin, që synon një tjetër fitore, që do ta afronte me kualifikimin në raundin tjetër. “Ne kemi parë shumë nga ndeshjet e tyre, në Ligë dhe Champions”, tha Sahin.

“Ky është një ekip i mirë, me lojtarë të mirë. Humbjen 2-9 që patën ndaj Bayern nuk e llogaris. Ata ndryshuan trajner dhe me ardhjen e Nenad Bjelicës skuadra ka ndryshuar fizionomi. Kanë një stil i dallueshëm që të bën për vete”, shtoi Sahin.

“Ne kemi një pozicion të shkëlqyer në renditje, me 9 pikë në 4 ndeshje. Sot do të jetë një ndeshje shumë emocionuese, por kemi një shans për sukses. Mund të bëjmë një hap vendimtar përpara, ky është qëllimi ynë, për t’u kthyer në Dortmund me një rezultat pozitiv”, tha Sahin.