Pas kaosit të fillimit të javës dhe pezullimit të ndeshjeve eliminatore të Australian Open në Melburn është rikthyer normaliteti dhe kanë rinisur ndeshjet. Shiu që ra gjatë pasdites së djeshme u ka dhënë një ndihmë organizatorëve, duke larguar tymin e krijuar nga zjarret dhe tani cilësia e ajrit në Melburn është e pranueshme.
Organizatorët bëjnë me dije se gjatë ditëve në vijim situata do të jetë normale dhe temperaturat do të jenë rreth 18-20 gradë. Madje pritet të ketë reshje shiu edhe në fundjavë, duke e bërë edhe më të pranueshme situatën për zhvillimin e ndeshjeve të raundit të parë, më 20 janar. Gjithsesi, janë ende mjaft ndeshje eliminatore pa u luajtur dhe pritet që deri të shtunën të jenë përcaktuar të gjithë tenistët që do të luajnë në raundin e parë.