Vinicius Junior ka bërë një deklaratë për të ardhmen e tij te Real Madrid, pas fitores ndaj Borussia Dortmund në finalen e Champions League.

Braziliani ishte padyshim lojtari më i mirë në fushë, duke shënuar golin e dytë për të siguruar fitoren dhe për të vendosur trofeun fort në duart e Los Blancos.

Duke folur pas ndeshjes, braziliani i dha një mesazh presidentit të Real Madrid, duke thënë hapur për Madrid Xtra:

“Dua të qëndroj këtu përgjithmonë. Shpresoj që presidenti Florentino Perez ta shohë këtë intervistë dhe të rinovojë kontratën time përsëri”.

Vinicius gjithashtu ndau gëzimin e tij për fitimin e Champions League, duke shtuar:

“Për mua është e pabesueshme. Ashtu si herën e parë, është një ndjenjë që as nuk mund ta mendosh ta përjetosh. I kemi borxh tifozëve tanë, vuajtëm por fituam si Real Madridi. Jam i lumtur. E dua këtë klub dhe të gjithë njerëzit që më sollën këtu.

“Dua të falënderoj presidentin që besoi tek unë dhe që më bleu nga Brazili kur isha shumë i ri. Mendoj se shpenzimi është shpërblyer, shpresojmë të vazhdojmë të fitojmë shumë”.