Edin Terzic largohet nga Borussia Dortmund, është zyrtare. Trajneri 41-vjeçar i kërkoi klubit që t’i ndërpresë menjëherë kontratën pas një diskutimi të përbashkët me klubin dhe nuk do të ulet më në stolin verdhezi sezonin e ardhshëm.
Pas 9 vitesh në klub, Terzic largohet në fund të dy sezoneve të fundit që sigurisht kanë pasur një ndikim të fortë: fillimisht Bundesliga e humbur në sekondën e fundit në 2023, pastaj finalja e fundit e Champions League në Wembley në të cilin Borussia duhej të dorëzohej para Real Madrid.
Akti i fundit i kompeticionit më të lartë europian do të mbetet ndeshja e fundit e Terzicit në krye të BVB-së, që tani do të duhet të kërkojë një zëvendësues për të planifikuar për të ardhmen.
Në një shënim zyrtar të klubit, Edin Terzic ka publikuar këtë mesazh:
“E dashur Borussia, edhe pse kjo më dhemb shumë tani, dua t’ju informoj se nga sot do të largohem nga BVB. Ishte një nder i madh që munda ta drejtoja këtë klub të madh drejt fitores në Kupën e Gjermanisë dhe në finalen e Champions League.
“Kam kërkuar nga përgjegjësit një dialog pas finales së Wembley sepse pas nëntë vitesh te BVB, duke përfshirë gjashtë në stafin e trajnerëve dhe dy vjet e gjysmë si trajner, mendoj se epoka e re e klubit duhet të fillojë me një njeri të ri.
“Ata që më njohin e dinë se gjatë këtij procesi vendimmarrës të javëve të fundit dy zemra më rrahin në gjoks. Por edhe pas diskutimeve intensive, ndjenja ime themelore nuk ka ndryshuar. Unë gjithmonë i uroj Borussia Dortmundit më të mirat, ju them faleminderit dhe mirupafshim”.
