Të mërkurën në mbrëmje, Liverpool do të nisë aventurën e tij në Carabao Cup, ku skuadra e “reds” do të përballet me West Ham. Trajneri Arne Slot foli në konferencën për shtyp për mundësinë që sulmuesi italian Federico Chiesa të luajë nga minuta e parë.
“Unë nuk mendoj se ai është në gjendje të luajë ende 90 minuta. Ai ka luajtur vetëm 25 minuta në tre, katër apo pesë muajt e fundit. Nuk ka luajtur edhe ndeshje miqësore me Juventus”, tha Slot.
“Gjithsesi, kemi mundësi të lëmë pushim disa lojtarë. Ndaj, për mendimin tim, ai është i aftë të jetë titullar në këtë sfidë.Ai mund ta bëjë këtë edhe nëse nuk mund të luajë 90 minuta në një nivel të lartë ndaj një ekipi të fortë si West Ham”, shtoi Slot.
Chiesa luajti për herë të parë në Anfield me fanellën e Liverpool të shtunën dhe tha: “Nuk luajta shumë, por isha shumë i lumtur që bëra debutimin tim. Isha i lumtur dhe i lehtësuar sepse doja të luaja këtu në Anfield”.
“Po stërvitem për të luajtur në Kupë kundër West Ham, po stërvitem intensivisht. Dua të jem gati dhe të luaj, por kjo varet nga trajneri. Kur ai e sheh të përshtatshme të më vendosë në fushë, do të më duhet të jem gati dhe të luaj”, tha Chiesa.
