Trajneri i Liverpool, Arne Slot, ka thënë se sulmuesi italian Federico Chiesa po bëhet gjithnjë e më mirë dhe më i fortë pas një fillimi të ngadaltë të karrierës së tij në “Anfield”.

Italiani erdhi këtë verë nga Juventus për 10 milionë euro, por ende nuk ka dhënë asgjë nga forma e tij e dikurshme, ai është aktivizuar vetëm në 4 ndeshje nga Slot dhe vetëm 1 herë në Premier League.

Fillimi i karrierës së tij te “reds” është penguar nga një problem muskulor, i cili e bëri atë të humbiste 15 ndeshje. Gjithsesi, Chiesa debutoi kundër Southampton mesjavën e kaluar dhe Slot tani ka lavdëruar përmirësimin që ka treguar.

“Ai po bëhet më i fortë dhe po bëhet më i mirë. Atij i duhej të përshtatej për një kohë të gjatë. Nëse ju mungon trajnimi me ekipin për kaq gjatë dhe shkoni në një Ligë me intensitet kaq të lartë dhe me një ekip që luan me kaq intensitet, duhet pak kohë”, tha Slot.

Në fund, trajneri holandez shprehet se ka pritshmëri të larta nga Chiesa: “Ai po bëhet i fortë, por përballet me shumë konkurrencë në pozicionin e krahut të djathtë. Gjithsesi, unë besoj tek ai dhe te fakti se mund të jetë një ndihmë e madhe për pjesën e mbetur të sezonit”.