Anglia rikthehet në finalen e një Europiani në futboll pas atij që humbi në shtëpinë e tij tri vite më parë me penallti ndaj Italisë. Këtë herë, kombëtarja e “3 luanëve” do të përballet me Spanjën në Berlin.

Ashtu si asokohe, në krye të kombëtares është ende Gareth Southgate. Trajneri i Anglisë, foli sot për “ITVSport” pas fitores kundër Holandës në gjysmëfinale. Një fitore që erdhi në minutën e fundit të kohës së rregullt.

“Kemi luajtur dhe djersitur shumë. Ishte një lojë e ndërlikuar dhe ne duhej të vazhdonim të ndryshonim mënyrën se si u rreshtuam në mbrojtje. Mbi të gjitha na duhej të përshtateshim vazhdimisht dhe lojtarët morën shumë vendime të mira”, tha Southgate.

“Përfundimi i ndeshjes, ai gol, fitorja dhe dalja sërish në finale është i veçantë për ekipin dhe është një shpërblim për atë që po i japin kauzës. Tani të punojmë për ta çuar deri në fund këtë që nisëm”, tha trajneri anglez.

“Gjëja më e rëndësishme është që i gjithë ekipi të jetë gati për të hyrë në lojë. Ne ndjemë, nga pikëpamja energjike, se kishim filluar të humbnim pak aftësinë kur shtypnim dhe Kane u dëmtua”, u shpreh Gareth Southgate, që aktivizoi Watkins, njeriun që realizoi golin e fitores.

“Ëatkins bëri mirë dhe ushtroi pressing te rivalët. Ne menduam se ishte një kohë e mirë për ta provuar që ai të luante dje, ndaj jam shumë i lumtur që Ollie mori momentin e tij, duke shënuar dhe na dha fitoren”, tha Southgate.