Anglia avancon në raundin tjetër të Euro 2024. Barazimi pa gola ndaj Sllovenisë i ka mjaftuar ekipit të trajnerit Gareth Southgate që të zërë vendin e parë në grup. Gjithsesi, skuadra angleze ka probleme me golin, çka konfirmohet nga fjalët e trajnerit të saj.

“Krijuam disa raste të mira, por nuk po arrijmë t’i konkretizojmë ato. Duhet të jemi më efikasë para portës. Mendoj se edhe lojtarët që u aktivizuan bënë mirë. Ne u përpoqëm ta fitonim ndeshjen me ndryshimet që bëmë”, tha Southgate.

“Palmer? Ai bëri shumë mirë. Ai gjen hapësira, krijon raste dhe ne e mbështetëm për të shënuar në fund. Ata janë lojtarë të rinj dhe ne po i zhvillojmë në një mjedis të vështirë. Ata patën një ndikim të mirë për ne dhe bënë gjëra të mira për ne. Anthony Gordon, Cole Palmer, Kobbie Mainoo po lëvizin shumë mirë”, tha trajneri i “3 luanëve”.

“Ne duhet të ndërtojmë të ardhmen nga këto ndeshje. Tani bëhet më e vështirë, duhet të luajmë mirë dhe me këdo që të përballemi. Sfida e ardhshme do të jetë një ndeshje vërtet e vështirë”, tha Southgate.

“Kemi pasur shumë probleme para turneut. Mendoj se mënyra se si luajti mbrojtja ishte shumë pozitive dhe diçka për të ndërtuar të ardhmen. Ne kemi krijuar mundësi në këto ndeshje, tani duhet të jemi në gjendje t’i materializojmë, në të kundërt do ta kemi të vështirë”, tha Gareth Southgate.