Pas shkarkimit të Erik ten Hag, vetëm pas dy javëve të para në Bundesligë, Leverkusen është vënë në kërkim të një trajneri të ri. Një nga emrat që klubi i “Aspirinave” ka kontaktuar së fundmi është edhe Thiago Motta.

Pas shkarkimit nga Juventus, Thiago Motta është i “papunë” dhe mesa duket do vazhdojë të jetë për një kohë të gjatë. Ish-trajneri i Juventus nuk duket shumë i bindur nga projekti i Leverkusen dhe e shikon veten e tij më shumë në Serie A, megjithatë ende nuk ka një përgjigje përfundimtare nga ana e tij.

Më shumë se vetë Motta, janë drejtuesit e Juventusit ata që po “luten” dhe shpresojnë që ai të pranojë ofertën e Leverkusen. Arsyeja? Fare e thjeshtë. Edhe pse u shkarkuar nga Juventus, Thiago Motta vazhdon të paguhet sipas kontratës që kishte me bardhezinjtë, e cila skadon në vitin 2027. Në rast se Motta do merrte drejtimin e Leverkusen, Juventus do të kursente 15 milionë euro, pjesa e mbetur nga rroga që i takon ish-trajnerit deri në vitin 2027.