Ekzaminimet mjekësore pas ndeshjes me Liverpool-in për Victor Osimhen zbuluan një lezion të shkallës së dytë të kërdhokullës së djathtë. Ja njoftimi për shtyp i lëshuar nga Napoli, në faqen e tij zyrtare:
“Siç ishte planifikuar, Victor Osimhen iu nënshtrua testeve diagnostike mëngjesin e sotëm, të cilat zbuluan një dëmtim të shkallës së dytë në kofshën e tij të djathtë. Sulmuesi kishte nisur të kryente terapitë që dje”.
🏥 @victorosimhen9, lesione di secondo grado del bicipite femorale destro.https://t.co/jTc0HQJOr1
— Official SSC Napoli (@sscnapoli) September 9, 2022
Napoli do ta vuajë shumë mungesën e sulmuesit kryesor, Osimhen. Sulmuesi i kombëtares nigeriane, i cili e nisi jo mirë ndeshjen e Ligës së Kampionëve kundër Liverpool-it (në të cilën gaboi nga pika e bardhë përballë Alisson), kishte dalë me dhimbje në fund të pjesës së parë. U pa qartë se dëmtimi nuk ishte i thjeshtë.
Rikthimi i Osimhen, jo në maksimumin e tij edhe para sfidës me skuadrën e Jurgen Klopp, sigurisht që do të bëhet pas pushimit në fund të shtatorit (kur luajnë kombëtaret). Momenti kur do ta shohim sërish në fushat e lojës do të lidhet pashmangshmërisht me evoluimin e kushteve të tij, të cilat do të duhet të rivlerësohen. Nuk ka Spezia dhe Milan në Serie A për të, me siguri, përveç udhëtimit evropian në Skoci, për t’u ndeshur me Rangers.
