Bayer Leverkusen humbi thellë 1-4 ndaj Arsenal në miqësoren e fundit, një rezultat që konsiderohet si një këmbanë alarmi për “aspirinat”. Ata fituan titullin në Bundesliga dhe Kupën e Gjermanisë, por ky sezon i ri duket më i vështirë nga parashikimi.

“E dimë se të rikonfirmohesh do të jetë më e vështirë se sa të fitosh. Në humbëm një ndeshje dhe më mirë që ndodhi tani në miqësore, pasi të gjithë mund të shohim njëri-tjetrin në sy e të kuptojmë se ku jemi dhe ku gabuam”, tha trajneri Xabi Alonso.

“Nuk kam dyshime se do të jetë më e vështirë, pasi në Gjermani duan të na mundin dhe në Europë do të ketë më shumë konkurrencë. Gjithsesi, jemi përgatitur mirë dhe mendoj se do të shkojmë sërish larg. Ky është ende një ekip i uritur”, tha trajneri spanjoll.

Në fund, trajneri Xabi Alonso i dha meritat Arsenal për fitoren: “Ata bënë një ndeshje të jashtëzakonshme. Ishin si kafshë dhe mendoj se do të shkojnë larg në kampionat këtë vit. Arteta ka bërë një punë të mirë dhe e merituan fitoren. Kemi ç’të mësojmë nga ata”.