Ishte ndeshja e diskutueshme ajo mes Real Sociedad dhe Barcelonës, e luajtur të dielën në “Reale Arena” të Anoeta. Ishte minuta e 13-të, kur Robert Lewandowski kaloi Barçën përpara në avantazh, pasi mori një top nga Frenkie de Jong. Arbitri Cuadra Fernández e akordoi golin menjëherë, por VAR-i ndërhyri dhe korigjoi vendimin e tij. Pra, e urdhëroi ta anulonte për pozicion jashtë loje, tepër i dyshimtë dhe aspak i qartë.

Ndeshja u ndërpre pak kohë për të prodhuar imazhin e pozicionit jashtë loje gjysmë automatik, i cili i ndezi më tej polemikat mbi vendimin për ta anuluar golin e sulmuesit polak. Në pamjet e ndryshme të ekranit shihet qartë se si këmba e paidentifikuar dot se e cilit lojtar është, përmes pozicionit gjysmë automatik, i atribuohet Lewandowskit në pozicion jashtë loje. Në fakt, dyshimet janë maksimale se ishte këmba e mbrojtësit të Real Sociedad më përpara.

Flick mundi ta shihte atë imazh gjatë pushimit dhe, pak para se të fillonte pjesa e dytë, shkoi t’i kërkonte arbitrit shpjegime. Kamerat e “Movistar LaLiga” detajojnë bisedën që trajneri i Barçës ka zhvilluar me arbitrin.

“Ju thoni se nuk është pozicion jashtë loje. Çfarë mund të bëj? Për ju nuk është asgjë e tillë, sepse është kundër ekipit tuaj…”, – i thotë arbitri kryesor bashkëbiseduesit Flick. Me këmbënguljen e trajnerit të Barçës, i cili nuk duket i bindur me shpjegimet e tij, arbitri justifikon vendimin: “Nëse VAR-i thotë se është jashtë loje, pse do ta shpiknim ne atë? Më dëgjo…, pse do ta shpiknim një pozicion jashtë loje”.

Flick nuk duket aspak i sqaruar, por Marcus Sorg dhe trajneri i portierëve, José Ramón de la Fuente, përpiqen ta tërheqin nga kërkimi i llogarisë karshi arbitrit. Shpjegimet nuk e bindën aspak trajnerin e Barçës, i cili e bëri të qartë zemërimin e tij në deklaratat pas ndeshjes: “Nuk isha i zemëruar, i thashë se ishte një vendim i gabuar, se nuk ishte jashtë loje”.