Jeta ka marrë shumë kthesa. Xabi Alonso është përzgjedhur për të drejtuar Chelsea sezonin e ardhshëm. Klubi londinez ka zgjedhur trajnerin bask, i cili do të ketë një tjetër mundësi për të treguar aftësitë e tij në pankinë, këtë herë në “Stamford Bridge”. Real Madridi e shkarkoi në fillim të janarit, pas një serie rezultatesh të dobëta dhe dhome zhveshjeje të përçarë, duke e lënë të prekur psikologjikisht.
Tani rikthehet në Premier League, ku ka luajtur si futbollist me Liverpool-in (2004–2009), ndaj i njeh mirë kërkesat e futbollit anglez. Përballë do të ketë si rival Mikel Artetën, i cili është pranë fitimit të Premier League me Arsenalin.
Të dy kanë qenë shokë fëmijërie dhe kanë ndarë dhomën e zhveshjes te Real Sociedad. Alonso kujton: “Kisha një mik në lagje që ishte i çmendur pas futbollit. Quhej Mikel Arteta. Çdo ditë zbrisnim me monopatina në plazh për të luajtur tenis, sërf dhe, sigurisht, futboll. Ky djalë ishte edhe më i çmendur se unë për futbollin…, ishte shumë konkurrues”.
Ai shton se lidhja e tyre vazhdon edhe sot, pas 30 vitesh, tani si trajnerë: “Ky djalë ishte ndoshta edhe më i çmendur se unë pas futbollit. Ishte pak më i vogël se unë dhe miqtë e mi, vetëm disa muaj ndoshta, por e dini si është në atë moshë, gjithmonë përpiqesh të ngacmosh ‘më të vegjlit’. Ne e provonim, por ai ishte një përbindësh konkurrues”.
Përpara se të takoheshin më vonë në dhomat e zhveshjes te Real Sociedad, ata kaluan bashkë fëmijërinë dhe paraadoleshencën, mes fundit të viteve ’80 dhe fillimit të viteve ’90. Ishin shumë të vegjël, por miq të ngushtë dhe pjesë e të njëjtit brez. “Ai donte të fitonte me çdo kusht, edhe sikur të ishte vetëm një ndeshje në plazh. Ajo dashuri për lojën nuk mësohet, besoj se lind me të. Kjo na bashkoi shumë dhe vazhdon ta bëjë edhe sot.
Para disa muajsh mora një telefonatë nga miku im i vjetër, Mikel. Si gjithmonë, folëm për futbollin. Ai më tha: Këtë javë kemi përballë Bayern Munich në Champions League, çfarë mendon? Dhe unë iu përgjigja: Ne kemi West Ham United, po ti çfarë mendon?”
