Edhe pse i dha fund karrierës në vitin 2009, fiziku i Paolo Maldinit mbetet pothuajse i pandryshuar. Merita i takon stërvitjes së vazhdueshme dhe një ushqyerjeje të ekuilibruar. Le të zbulojmë të gjitha sekretet e tij.
Fizik sportisti edhe në moshën 58-vjeçare
Paolo Maldini ishte shembull përkushtimi në fushë dhe vazhdon të jetë i tillë edhe jashtë saj, duke ruajtur një formë të jashtëzakonshme në moshën 58-vjeçare. Ish-kapiteni i Milanit e mbylli karrierën si futbollist në vitin 2009 dhe më pas u bë drejtues sportiv, duke fituar një titull kampion me Milanin në vitin 2022. Megjithatë, ai nuk e ka “fikur kurrë motorin”. Përkundrazi, ka vazhduar të stërvitet rregullisht, duke kombinuar palestrën me sporte të tjera: ushtrime me pesha, kardio, si edhe tenisin e padelin, dy pasionet e tij të mëdha. Ja cilat janë sekretet e formës së tij.
Maldini në palestër, peshat dhe stabiliteti i trungut
Sekreti i Paolo Maldinit qëndron te vazhdimësia, e njëjta që e karakterizonte edhe si futbollist. Ai nuk lë kurrë të kalojnë më shumë se dy ditë radhazi pa u stërvitur, por njëkohësisht pranon se nuk mund të ushtrohet me të njëjtin intensitet si 20 vite më parë. Programi i tij bazohet tek ekuilibri dhe rregullsia.
Ish-kapiteni kuqezi i kushton rëndësi të madhe stabilitetit të trungut (core stability), pra aftësisë për të kontrolluar dhe stabilizuar pjesën qendrore të trupit, ku përfshihen barku, shpina dhe legeni. Për këtë arsye ai nuk punon vetëm me pesha, të cilat janë gjithmonë pjesë e programit, por kryen edhe ushtrime me peshën e trupit dhe qarqe rezistence muskulore. Natyrisht, nuk mungon as stërvitja kardio, për të përmirësuar kapacitetin aerobik dhe qëndruar gjithmonë në formë. Pikërisht falë kësaj disipline, në moshën 58-vjeçare Maldini vazhdon të ketë trupin e një sportisti.
Tenisi dhe padeli
Përveç palestrës, Maldini ka pasur gjithmonë dy pasione të mëdha: tenisin dhe padelin. Tenisi e ka shoqëruar për shumë vite, aq sa në vitin 2017 provoi veten edhe në një turne profesionist, duke marrë pjesë në “Challenger” e Milanos në kategorinë dyshe, së bashku me trajnerin e tij Stefano Landonio. Edhe pse u eliminuan, ngjarja bëri bujë, pasi ishte hera e parë që një ish-futbollist merrte pjesë në një turne të tillë.
Vitet e fundit edhe Maldini, si shumë të tjerë, është pasionuar pas padelit. Ai jo vetëm e praktikon si aktivitet sportiv, por mbështet edhe projektin “Para Padel Project”, ideuar nga miku i tij Pippo Galliano, i cili e përdor padelin si mjet rehabilitimi dhe përfshirjeje sociale për personat me dëmtime të shtyllës kurrizore.
Dieta pa teprime, pa pije freskuese
Sa i përket ushqyerjes, Paolo Maldini ka preferuar gjithmonë një dietë të ekuilibruar, pa teprime dhe pa kufizime ekstreme. Megjithatë, për një gjë është shumë i rreptë: nuk konsumon pije të gazuara apo të ëmbëlsuara dhe i kushton vëmendje të veçantë çdo produkti që përmban sheqerna të shtuar. Maldini kufizon gjithashtu konsumimin e alkoolit, pi shumë ujë dhe e bazon dietën kryesisht te drithërat integrale dhe proteinat pa yndyrë.
Familja dhe dashuria
Paolo Maldini është i martuar që nga viti 1994 me Adriana Fossa, modele, aktore dhe sipërmarrëse nga Venezuela. Ajo ka parakaluar për Gianni Versace, ka punuar në emisionin “Telemike” me legjendarin Mike Bongiorno, ndërsa sot merret me sipërmarrje, veçanërisht në sektorin e veshjeve. Adriana është gjithashtu shumë aktive në bamirësi, sidomos në aktivitetin “Convivio”, i cili mbledh fonde për kërkimet mbi HIV-in.
Paolo dhe Adriana kanë dy djem, Daniel dhe Christian, të dy futbollistë. Familja “Maldini” zë një vend të veçantë në historinë e futbollit italian. Babai i Paolos, Cesare Maldini, ishte kapiten i Milanit që fitoi Kupën e Europës në vitin 1963 dhe më vonë trajner i kombëtares italiane në Botërorin 1998.
Paolo trashëgoi një mbiemër të madh dhe e ktheu atë në legjendë: 25 sezone me Milanin, 5 trofe të Champions League dhe 7 tituj kampionë të Italisë. Edhe djali i tij, Daniel Maldini, luajti për Milanin dhe më pas debutoi me kombëtaren italiane. Në atë ditë të veçantë, natyrisht, e gjithë familja ishte në tribunë për ta mbështetur.
