Trajneri i Manchester United, Erik ten Hag, beson se Ruud van Nistelrooy mund të jetë vendimtar në shndërrimin e sulmuesve aktualë të këtij ekipi në yje. Vija e parë e United do të jetë nën presion në fillim të sezonit, pasi Rasmus Hojlund do të mungojë për shkak të dëmtimit.

Kjo do të thotë se Zirkzee ka shanse të startojë titullar. Marcus Rashford dhe Antony kaluan një sezon të fundit të vështirë, ndërkohë që janë edhe dy emra të tjerë që mund të ndihmojnë, si Alejandro Garnacho dhe Amad Diallo, të cilët mund të luajnë role të mëdha.

“Van Nistelrooy do të ketë ndikim te sulmuesit, por do të punojë edhe në fusha të tjera. Unë mendoj se sulmuesit patjetër do të përfitojnë nga kjo, por ai do të punojë së bashku me Rene Hake për të drejtuar ekipin”, u shpreh Ten Hag..

“Ata janë dy trajnerë me shumë përvojë, që të dy kanë qenë menaxherë. Ata dinë të trajnojnë një ekip, si ta çojnë atë përpara dhe të sfidojnë ekipin në mënyrë që ata të jenë gati për të fituar ndeshje dhe për të fituar trofe. Jemi shumë të kënaqur që i kemi të dy në bord”, tha trajneri i “djajve të kuq”.

“Van Nistelrooy shënoi kaq shumë gola, ai pati kaq shumë sukses, kështu që padyshim do t’i ndihmojë sulmuesit tanë në fusha të ndryshme. Sidomos në anën mendore, duke sjellë dëshirën e tij për të fituar ndeshje dhe duke shënuar gola. Duhet të sulmojmë me 11 lojtarë dhe duhet të mbrohemi me 11 lojtarë”, tha Ten Hag.