Pas nënshkrimit të Joao Neves nga Benfica, PSG ka rifilluar përpjekjet e tyre në tregun e transferimeve dhe thuhet se janë në bisedime të drejtpërdrejta për të siguruar shërbimet e Jadon Sancho të Manchester United.

Sancho ka qenë jashtë planeve të skuadrës së United që nga përplasja e tij me Erik ten Hag dhe nuk ka luajtur ndeshje zyrtare për klubin për më shumë se një vit.

Ai u huazua te Borussia Dortmund në janar, ku bëri paraqitje të mira, dhe rrjedhimisht ishte pjesë e skuadrës së Djajve të Kuq gjatë turneut të tyre parasezonal në Shtetet e Bashkuara.

Sipas Transfers Podcast, PSG dhe Manchester United kanë diskutuar për Sanchon ndërsa po negociojnë edhe një marrëveshje të mundshme për Manuel Ugarte.

PSG refuzoi ofertën prej 50 milionë eurosh të United për Ugarte, duke kërkuar 60 milionë euro, të cilat United nuk dëshiron t’i paguajë.

Ndërsa PSG po e konsideron Sanchon si një zëvendësues të mundshëm për Kylian Mbappe, i cili iu bashkua Real Madridit, prioriteti i tyre kryesor mbetet Khvicha Kvaratskhelia i Napolit.

Megjithatë, kjo marrëveshje aktualisht ka ngecur për shkak të çmimit të kërkuar nga Napoli, të cilin klubi francez nuk dëshiron ta përmbushë.

Sipas raportit, drejtuesit e Parisit kanë gjithashtu shqetësime se si Sancho do të përshtatej me stilin e lojës së Luis Enrique dhe po vlerëson rekordin e tij disiplinor.

Pavarësisht kësaj, bisedimet janë ende në vazhdim, dhe një marrëveshje mund të arrihet nëse PSG vendos të ecë përpara.

24-vjeçari iu bashkua Manchester United në vitin 2021 me bujë të madhe, por nuk i ka përmbushur pritjet.

Ai ka bërë 82 paraqitje për klubin, duke shënuar vetëm 12 gola në tre sezone.