Me dy fitore në dy ndeshje e para të Premier League e kanë projektuar skuadrën e Liverpool mes pretendentëve për titull këtë sezon. Duket se largimi i Klopp dhe ardhja e Slot në stol nuk ka ndikuar shumë te “reds”, të paktën për momentin, një ekip që po bind në fushë.

“Nëse jam i sinqertë, mendoj se shumica e lojtarëve janë mësuar me atë që ne duam. Gjithsesi, kjo ka të bëjë shumë me faktin se ne nuk bëjmë shumë gjëra të ndryshme nga ajo që bëri Jurgen në të kaluarën. Ndoshta ka vetëm ndryshime të vogla, por shumica është e njëjtë”, tha Slot.

“Natyrisht që disa detaje janë pak më ndryshe, por ka të bëjë edhe me kundërshtarin me të cilin përballeni. Ipsëich dhe Brentford na e bënë mjaft të vështirë, por mendoj se janë skuadra që nuk do të duelojnë për titull. Kështu që, ne kemi shumë për të provuar kundër skuadrave që mund të përfundojnë në gjashtëshen e parë”, tha Slot.

Duke folur për fitoren 2-0 ndaj Brentford dhe faktin se nuk kanë pësuar gol në dy sfidat e para, trajneri holandez shtoi: “Performanca jonë në mbrojtje është vërtet e mirë. Ne kontrolluam kundërsulmet, i kontrolluam kundërshtarët në zonën tonë. Përveç kësaj, ne krijuam shumë raste të mira në pjesën e dytë”.

“Mendoj se tifozët e Liverpool i panë këto paraqitje shumë here me Klopp në stol. Ajo që dua të them me kontroll është kur pranojmë kundërsulmin, shohim të gjithë duke u kthyer me sprint duke provuar gjithçka që nuk mund të pranojnë. Kjo është ajo që ndodhi në të vërtetë”, u shpreh Arne Slot.