Lautaro Martinez nuk e kaloi as mbrëmë, kundër Monza, ngërçin. Qendërsulmuesi kryesor i Interit, si dhe golashënuesi më i mirë i kampionatit të fundit të Serie A, mbeti sërish pa gol. Llogaria e tij në sezonin aktual është me zero gola dhe zero asiste në 225 minuta të luajtura me zikaltrit në Serie A.

Kjo “sindromë” nuk kufizohet vetëm në këtë fillim sezoni, nëse e ktheni pak “kasetën” prapa. Duke parë mes këtij sezoni futbollistik dhe atij të fundit, mund të shohim se “agjërimi” i Lautaro Martinez ka nisur shumë kohë më parë. Në fakt, që nga ardhja e pranverës.

Nga marsi e në vazhdim, qendërsulmuesi argjentinas ka shënuar në fakt vetëm 1 gol me fanellën e Interit (çështje tjetër në kombëtare, ku për shembull ishte golashënuesi më i mirë në Kupën e Amerikës, e fituar nga Argjentina).

Edhe ky gol nuk ka pasur shumë ndikim, duke qenë se ishte i katërti i fitores 5-0 ndaj Frosinone në shtëpi, në kampionatin e kaluar. Pra, ka pasur “errësirë” ​​përreth tij në 6 muajt e fundit.

Mbrëmë, performanca e Lautaro Martinez kundër Monza u gjykua me notën 5, sipas TMW: “Si do të përballet kapiteni zikaltër me Manchester City dhe derbin e Madoninës pa u çliruar psikologjikisht dhe zhbllokuar me gol? Kur e sheh në fushë, dëshira e tij për të shënuar është e madhe, por ka shpërdoruar mjaft raste”.