Sot do të nisë zyrtarisht Liga e re e Kampionëve, në të cilën do të marrin pjesë 5 skuadra nga Serie A: Atalanta, Bologna, Inter, Juventus dhe Milan. Këtë edicion ka shumë risi të implementuara nga UEFA: një grup i vetëm prej 36 skuadrash, secila prej të cilave do të luajë 8 ndeshje (4 në shtëpi dhe po aq jashtë fushe).
8 më të mirat e renditura në këtë format të ri, me një grup të vetëm, do të kualifikohen për në 1/8 finale, ndërsa ato që pozicionohen midis vendit të 9-të dhe 24-t do të duhet të përballen me “play-off”-in për të vazhduar më tej. Për skuadrat që zënë pjesët e poshtme të renditjes finale, nuk ka më rënie në Ligën e Europës, siç ndodhi deri në sezonin e kaluar.
Por sa pikë do t’i nevojiten çdo skuadre për të kaluar në fazën tjetër, pra në 1/8 finale? Sistemi “Elo”, i përdorur për shah, u përpoq të bënte 10 mijë simulime dhe ja çfarë doli. Për të përfunduar i teti në renditjen e grupit të vetëm, vendi i fundit i disponueshëm për të hyrë drejtpërdrejt në fazën e eliminimit direkt (1/8 finale), në 43% të rasteve dhe simulimeve të kryera do të nevojiten 15 pikë; në 30% të rasteve 16 pikë dhe në 21% të rasteve 14 pikë.
Për sa i përket pjesës më të ulët të renditjes, vendi i 24-t (i fundit i disponueshëm për “play-off”) jepet në 54% të rasteve me 9 pikë dhe në 23% të rasteve me 8 pikë. Megjithatë, rreziku i 9 pikëve, sipas sistemit, është ai që duhet të luajë për raundin tjetër me skuadrat e tjera në bazë të diferencës së golave.
Tani fjala kalon në fushë dhe Italia, falë renditjes, do të përfaqësohet këtë edicion me 5 skuadra. Katër prej tyre do t’i luajnë ndeshjet e para në shtëpi: Juventus-PSV Eindhoven (e martë, ora 18:45) Milan-Liverpool (e martë, ora 21:00), Bologna-Shakhtar Donetsk (e mërkurë, ora 18:45) dhe Atalanta-Arsenal (e enjte, ora 21:00).
Interi do të startojë jashtë fushe, në stadiumin “Etihad”, kundër Manchester Cityt (e mërkurë, ora 21:00): Inzaghi dhe ekipi i tij do të përpiqen të hakmerren, pjesërisht, për finalen që humbën në vitin 2023 në Stamboll.
