Rinovimi i Barcelonës është gati të fillojë. Klubi Blaugrana mund të ndryshojë shumë elementë gjatë merkatos së verës. Skuadra e Xavit nuk arriti të sjellë tituj në shtëpi këtë sezon, duke u eliminuar nga Champions League në çerekfinale nga PSG-ja, pas humbjes 4-1 në kthim. Kjo është arsyeja pse njerëzit e merkatos së klubit katalanas po punojnë për të gjetur elementët e duhur, që mund ta forcojnë grupin në dispozicion të Xavit.

Midis tyre është sulmuesi i Liverpool-it, Luis Diaz, një adhurues i Barçës dhe alternativë e mundshme për korrikun. Megjithatë, në një intervistë të publikuar ditën e djeshme, lojtari i lindur në vitin 1997 hodhi poshtë çdo mundësi për transferim, duke u shprehur se ndihet shumë rehat në Premier League, duke veshur fanellën e “Reds”:

“Ardhja në këtë klub të madh, që është Liverpool-i, ishte arritje e jashtëzakonshme në karrierën time. Këtu mësoni gjithnjë e më shumë si të jeni profesionist, një person më i mirë, shok skuadre dhe djalë i mirë. E vërteta është se jam shumë i lumtur këtu, vite të shkëlqyera po vijnë për klubin, nuk kam asnjë dyshim për këtë”.