Sulmuesi anglez Jadon Sancho duket se po kalon një moment të mirë në Premier League me Chelsea. Lojtari iu bashkua Chelsea verën e kaluar në formë huazimi me detyrimin blerje, ndërkohë që ka shënuar dy gola radhazi në Premier League.

Në një intervistë për SkySports, ai foli për formën aktuale dhe ambiciet e trajnerit Enzo Maresca: “Jam i fokusuar ndeshje pas ndeshje dhe shpresoj të vazhdoj kështu. Jam shumë i lumtur, punoj shumë për ekipin dhe objektivi kryesor është të marrim tre pikë çdo javë”.

“Lojtarët që kemi në skuadër janë të rinj por të jashtëzakonshëm. Ndaj, çdo ditë në stërvitje ne shtyjmë fort. Çdo herë që kemi një mundësi ne duam të tregojmë se çfarë mund të bëjmë”, shtoi sulmuesi 24-vjeçar.

Më tej, ai shtoi: “Mendoj se djemtë kanë krijuar një lidhje të mirë mes tyre në dhomën e zhveshjes, por është shumë e vështirë nëse nuk i bëni gjërat siç duhet. Them se secili lojtar është përshtatur në mënyrën e tij për të punuar dhe është i etur për të mësuar”.

Për shanset që ka Chelsea për të fituar Premier League, tha: “Ne po i marrim ndeshjet një e nga një dhe secila prej tyre do të jetë e vështirë. Kemi një sezon të gjatë përpara, nuk kemi bërë ende asgjë, por jemi mirënjohës që jemi në këtë pozicion. Po stërvitemi fort dhe po japim gjithçka në ndeshje”.