E pabesueshme çfarë i ka ndodhur Guido Burgstaller. Sulmuesi 35-vjeçar i Rapidit të Vjenës, sipas raportimeve të “Sky Sports DE”, ka pësuar dëmtime të rënda gjatë një sulmi fizik. Sipas një komunikate të detajuar nga klubi austriak, lojtari ka pësuar lëndime serioze në kokë, përfshirë një frakturë në bazën e kafkës.
Nga të dhënat e publikuara, Burgstaller është sulmuar nga një person i panjohur në qendër të Vjenës. Si pasojë, ai ka marrë dëmtime të rënda dhe për këtë arsye Rapid pret një mungesë të gjatë nga ana e tij, që mund të zgjasë disa muaj. Sulmuesi do të duhet të qëndrojë në spital për ekzaminime dhe trajtime të mëtejshme në ditët e ardhshme. Ironikisht, lojtari kishte planifikuar ta përfundonte karrierën e tij verën e ardhshme, pasi ishte kthyer në skuadër në verën e vitit 2022. Pas këtij incidenti, e ardhmja e tij mbetet e paqartë. Deri më sot, ai ka regjistruar 203 paraqitje me Rapidin, duke shënuar 69 gola.
Ja deklarata zyrtare e klubit: “Një lajm shumë i trishtë duhet të komunikohet para ndeshjes së fundit në shtëpi për sezonin e Rapidit. Guido Burgstaller ka qenë viktimë e një sulmi fizik gjatë fundjavës, në prani të dëshmitarëve, dhe ka pësuar lëndime të rënda në kokë. 35-vjeçari nga Karintia është sulmuar nga një person i panjohur në qendër të Vjenës dhe, pas rrëzimit të shkaktuar nga një goditje e dhunshme, ka pësuar, ndër të tjera, frakturë në bazën e kafkës. Burgstaller është vizituar dhe trajtuar menjëherë në një spital në Vjenë.
Fatkeqësisht, ai do të duhet të kalojë disa ditë të tjera në spital dhe, gjithashtu, është e sigurt se nuk do të mund ta ushtrojë profesionin e tij për disa muaj. Rapid i uron lojtarit të tij të guximshëm shërim të shpejtë dhe pa komplikime, si dhe ka besim tek autoritetet përkatëse se autori i sulmit, ende i panjohur, të identifikohet dhe të ndëshkohet sa më parë.
Kërkojmë që të respektohet privatësia e Guido Burgstaller dhe familjes së tij. Nëse ka të reja në ditët në vijim, ato do të komunikohen nga SK Rapid në marrëveshje me departamentin e tij mjekësor dhe me Guido Burgstaller. Rapid do ta mbështesë plotësisht Guido Burgstaller në çdo fazë të procesit të tij të rikuperimit, duke shpresuar për një shërim të plotë dhe të shpejtë”.
