Për Real Madrid nuk ka alternativë tjetër veçse të fitojë Kupën e Botës për Klube, event i cili fillon javën e ardhshme në Shtetet e Bashkuara. Këtë gjë e konfirmoi Kaká në një intervistë për kanalet zyrtare të FIFA-s.
“Për Real Madrid, nuk ka alternativë tjetër përveç fitores. Të gjitha pritshmëritë janë tek Real Madrid: Të fitojë gjithmonë. Në çdo turne ku Real Madrid merr pjesë, pritet që ata të arrijnë në finale dhe të fitojnë“, deklaroi braziliani.
Kaká, i cili fitoi Kupën e Botës për Klube me Milan në vitin 2007, në finalen kundër Boca Juniors, tha gjithashtu se e konsideron veten një tifoz të Real Madrid, me të cilin ka luajtur dhe se do ta mbështesë në kompeticion.
“Shpresoj që Real Madrid të mund të shkojë sa më larg, të arrijë në finale dhe, natyrisht, të ketë mundësinë për të fituar, duke bërë histori edhe një herë”, tha Kaká, duke iu referuar formatit të ri të turneut.
