Në Vlorë më në fund po gjejnë rrugën e duhur, sepse pas një fillimi tepër zhgënjyes të sezonit, në javët e fundit ka pasur përmirësim të dukshëm dhe fitorja në Rrogozhinë ishte sinjali i kthesës së madhe që presin tek Flamurtari.

Edhe në Rrogozhinë ra në sy pjesëmarrja masive e tifozerisë kuqezi, me grupimin e njohur të ultrasve Flota Kuqezi që dominonte në stadium. Mbështetje pa kushte për lojtarët, kore edhe për Edlir Tetovën që ka pasur probleme shëndetësore ditët e fundit, por gjithashtu ra në sy një kor kundër Artim Pollozhanit.

Drejtori sportiv i Flamurtarit është kthyer në “non grata” për Flotën, që ka disa javë që kërkon largimin e tij. Zanafilla qëndron pikërisht tek fillimi i dobët i sezonit. Flota pas disa humbjesh rresht pati kritika për të gjithë, diçka e natyrshme duke parë shpenzimet për ndërtimin e një ekipi goxha ambicioz në letër, por jo në fushë.

Pollozhani doli kundër ultrasve, duke mos i pranuar kritikat dhe vërshëllimat e tyre, edhe pas humbjeve tepër zhgënjyese, mbi të gjitha me lojë të dobët. Ultrasit vlonjatë e kanë ndjekur ekipin kudo dhe e kanë mbështetur, por edhe për tifozët durimi ka kufi. Lufta me Pollozhanin nuk ndalet dhe vështirë se Sinan Idrizi del kundër tifozerisë vlonjate.