Trajneri i Spanjës, Luis De La Fuente, ka folur për gazetën iberike “AS”, para ndeshjes gjysmëfinale të Kampionatit Europian kundër Francës.
Yamal është “rrufeja”, Nico Williams është “bubullima”. A do të ketë ndonjë stuhi prej tyre?
Natyrisht. Është e vërtetë që kur ke lojtarë kaq të shpejtë, që bëjnë kaq shumë tranzicione, ekzistojnë edhe rreziqet. Me një ekip më të hapur dhe më të ekspozuar, kundërsulmet e kundërshtarit mund të jenë fatale. Ne mund të përmirësohemi edhe në këtë aspekt. Jo gjithmonë mund të luani me 100 në orë, nuk është një slogan i imi. Nuk vlejnë shumë shpejtësia dhe fuqia pa kontroll, duhet ta zotëroni shpejtësinë, kontrollin e lojës… Megjithatë, ata të dy janë futbollistë fantastikë, por ndonjëherë duhet të ngadalësohemi si ekip.
Në ndeshjen e fundit, Lamine u largua paksa i mërzitur… A ju bëri kjo të reflektoni për menaxhimin e tij në moshën 16-vjeçare?
Nuk e kam parë aspak të zemëruar. Prioriteti këtu është skuadra; lojtarët janë më të mirët që kemi në dispozicion këtu. Mendoj se është bërë modë të keqinterpretohen gjërat. Për mua, një lojtar mund të ketë ambicie të luajë gjithmonë, por jo ta shoh të vrenjtur nëse zëvendësohet. Kjo do të ishte mosrespektim ndaj atyre që vijnë në fushë nga stoli. Sidoqoftë, Lamine nuk përshtatet me këtë. Ai është një djalë i jashtëzakonshëm, me të kemi marrëdhënie të mrekullueshme. Mos harroni se ne kemi gjithashtu potenciale të tilla si Ferran, Ayoze, Olmo, Oyarzabal.
Cili është plani për ta ndaluar Mbappe?
Unë do t’ju them shpejt se me lojtarët e këtyre karakteristikave, të cilët kanë shumë goditje, si edhe Dembélé, ndihma e shokëve tuaj të skuadrës është e rëndësishme. Është e vetmja mënyrë, përveç ruajtjes së ekuilibrit si ekip.
