Botërori ende nuk ka nisur, por brenda grumbullimit të Brazilit ndjejnë se kanë diçka për të provuar. Ekziston përshtypja se bota e futbollit nuk e sheh më “Seleçaon”, si një nga favoritët kryesorë, por si enigmë.

Për këtë arsye, zërat brenda kampit brazilian po dëgjohen gjithnjë e më fort. Reagimi më i fuqishëm erdhi nga Bruno Guimarães, i cili mbrojti peshën historike të një kombëtareje që, sipas tij, po nënvlerësohet padrejtësisht. “Askush tjetër nuk ka pesë yje në fanellë”, – kujtoi mesfushori, duke iu referuar krenarisë së një skuadre që mbetet më e suksesshmja në historinë e Botërorëve.

Mesazhi që përsëritet në dhomat e zhveshjes është i qartë. Brazili i kupton dyshimet për një projekt të nisur së fundmi, por nuk pranon të përjashtohet nga gara para kohe. Kombëtarja ka kaluar vite të vështira, me rezultate të paqëndrueshme, ndryshime trajnerësh dhe ndjesinë se talenti i madh i disponueshëm nuk është shndërruar kurrë në një projekt të qëndrueshëm. Kritikat pranohen si pjesë e procesit, por ajo që shqetëson është perceptimi se shumë njerëz kanë vendosur tashmë që ky Brazil nuk është gati të luftojë për titullin.

Danilo, një nga figurat më me peshë në skuadër, e përmbledh më mirë këtë ndjenjë: “Kam qenë një kritik i ashpër i ndryshimeve dhe i menaxhimit të dobët (të CBF-së). Sidoqoftë, këtë vit duhet të pranoj se ristrukturimi që po zhvillohet sjell qetësi për të gjithë… Dhe tani është e pamundur të mos flasësh për ëndrrën e popullit brazilian…”

“Argjentina nuk ishte favorite në Botërorin e fundit dhe e fitoi atë…” Ky është shembulli që përdoret për të kujtuar se parashikimet rrallë fitojnë ndeshje. Bruno Guimarães e përsëriti këtë ide, ndërsa ardhja e Carlo Ancelottit synon të sjellë rregull në një skuadër ku talenti nuk ka munguar kurrë, por shpesh ka munguar fryma kolektive.

Disa kritika kanë lënë gjurmë në grup, veçanërisht ato të Michael Olise. “Kemi lojtarë të mëdhenj që shkëlqejnë në ekipet më të mira të botës, si Vini dhe Raphinha. Duhet të tregojnë respektin e duhur ndaj lojtarëve tanë”, – theksoi Guimarães.

Prandaj, pyetja që qarkullon këto ditë në kampin verdhejeshil është e thjeshtë: a do të ishte vërtet kaq surprizë nëse Brazili do ta fitonte Botërorin? Brenda kombëtares i kuptojnë dyshimet, por jo faktin që shumë i kanë përjashtuar nga gara para se ajo të nisë.