Dino Zoff, kampion bote dhe Europe me Italinë, mbron Donnarumma mbas vendimit të PSG-së për ta larguar, pas fitimit të Champions League: “Nuk e kuptoj. Pas atyre që tregoi sezonin e kaluar, Champions-i u fitua edhe falë pritjeve të tij. Nuk e kuptoj vërtet, përveç nëse ka diçka tjetër që ne nuk e dimë”.

Zoff komentoi edhe kërkesën e Luis Enrique për një portier më të mirë me këmbë: “Së pari duhet një portier që të presë topat, pastaj nëse di të luajë me këmbë, aq më mirë. Nuk e kuptoj si mund të jetë problem portieri që eviton gola të sigurt, por nuk luan mirë me topin. Një si Donnarumma i fiton ndeshjet me pritjet e tij, por nuk mund të hyj në mendjen e një trajneri që sapo ka fituar Champions-in”.

Për transferimin te Manchester City: “Do të jetë një eksperiencë e shkëlqyer për të. Një portier si Donnarumma nuk mund të rrinte rezervë, do të ishte problem edhe për kombëtaren”.