Lajme të mira për Barcelonën përpara sfidës në kampionat ndaj Real Valladolid dhe, mbi të gjitha, në prag të ndeshjes së kthimit gjysmëfinale të Ligës së Kampionëve kundër Interit, e planifikuar për të martën mbrëma në “San Siro”.

Në stërvitjen e fundit, para transfertës së të shtunës, trajneri Hansi Flick ka rikuperuar mesfushorin Marc Casadó. Futbollisti është stërvitur me pjesën tjetër të grupit dhe është gati të rikthehet në listën e të grumbulluarve.

Casadó, i lindur në Sant Pere de Vilamajor, u dëmtua më 16 mars, gjatë ndeshjes së kampionatit ndaj Atlético Madridit në “Metropolitano”. Bëhej fjalë për këputje të pjesshme të ligamentit të jashtëm në gjurin e djathtë.

Fillimisht u parashikua një mungesë prej rreth dy muajsh, disa menduan se sezoni për mesfushorin e lindur në vitin 2003 kishte përfunduar. Megjithatë, ndryshe nga pritshmëritë, jo vetëm që sezoni i tij nuk ka përfunduar, por Casadó ia ka dalë ta shkurtojë edhe me një javë afatin e rikuperimit. Këtë e raporton gazeta katalanase “Sport”.