Gerard Piqué rrezikon deri në 12 ndeshje pezullim pas sjelljes së tij ndaj arbitrave në ndeshjen Andorra-Mirandés. Sipas raportit të arbitrit, Piqué si president, së bashku me drejtorin sportiv Jaume Nogués dhe menaxherin Carles Manso i ofenduan arbitrat në tunelin e dhomave të zhveshjes me fraza si “mashtrues”, “bij kurvash”. Kjo situatë kërkoi edhe ndërhyrjen e policisë.

RFEF ka hapur procedurë disiplinore për të sqaruar ngjarjen, pa dhënë ende një dënim të drejtpërdrejtë. Neni 99 i Kodit Disiplinor parashikon pezullim nga 4 deri në 12 ndeshje për ofendime ndaj arbitrave, ndërsa neni 100 të njëjtin dënim për kërcënime ose sjellje intimidimi, me mundësi bashkimi të shkeljeve.

Edhe stafi i Andorrës është ndëshkuar. Daniel Soriano, magazinier, mori 2 ndeshje pezullim për protesta nga stoli, ndërsa trajneri i portierëve Daniel Ortiz paralajmërim për gjeste mosaprovimi. RFEF do të vendosë nëse do të hapë një dosje të plotë apo do ta mbyllë rastin.