Inter ka fituar 2-0 ndaj Lazios në “San Siro”, në sfidën e fundit të javës së 11-të në Serie A. Zikaltrit gjetën golin që në minutën e 2-të, ku pas një aksioni të gjatë dhe pasimit të marrë nga Alessandro Bastoni, Lautaro Martinez mposht Provedel me një goditje shumë të bukur me të djathtën brenda zonës.
Me golin e shënuar sot, Lautaro është lojtari i katërt në historinë e Interit që ka shënuar të paktën 10 gola në shtatë vite të ndryshme kalendarike në Serie A, pas Alessandro Altobelli (shtatë vite), Benito Lorenzi dhe Giuseppe Meazza (të dy nga tetë vite). Pjesa e parë mbyllet 1-0 për Interin.
Goli i dytë për ziklatrit erdhi në minutën e 62-të, pas kombinimi fantastik Martinez-Dimarco-Ange-Yoan Bonny, francezi shtyn topin në rrjetë. Dy minuta më pas, Inter gjen edhe golin e tretë me të sapofuturin në fushë, Piotr Zielinski, i cili shënon një gol fantastik me një goditje të bukur nga distanca. Ndërhyn VAR, goli i polakut anulohet për një prekje të topit me dorë nga vetë ai, gjatë aksionit.
Rezultati final mbetet 2-0. Pas kësaj fitoreje, Inter ngjitet në vendin e parë me 24 pikë, po aq sa Roma e vendit të dytë, por zikaltrit kanë golavarazh më të mirë.
