Lamtumirë barazimeve pa gola. Java e 12-të e Serie A regjistroi një ndryshim kursi. Për herë të parë në këtë kampionat, asnjë ndeshje nuk përfundoi 0-0. Për më tepër, 35 golat e shënuar këtë javë përbëjnë një rekord për edicionin aktual të kampionatit italian. Ende larg rekordit të sezonit 1950/51 (54 gola), por sërish një shifër inkurajuese.
Ajo që bie në sy, megjithatë, është renditja e golashënuesve. Edhe pse humbi penalltinë, Hakan Çalhanoglu mbetet finalizuesi më i mirë i këtij kampionati, tashmë thuajse në një të tretën e sezonit. Bashkë me turkun e Interit vazhdon të jetë Riccardo Orsolini i Bologna. Atyre iu janë shtuar milanisti Christian Pulisic dhe argjentinasi i Comos, Nico Paz.
Megjithëse amerikani luan në një sulm me dy veta, së bashku me Leao, asnjëri prej tyre nuk mund të konsiderohet “9” në kuptimin tradicional. Sulmuesit e parë të mirëfilltë në klasifikim, me 4 gola të shënuar, mbeten Giovanni Simeone, Andrea Pinamonti, Ange-Yoann Bonny, Lautaro Martinez, Santiago Castro dhe Mateo Pellegrino.
Një rast unik në Europë. Serie A, në këtë krizë të bomberëve, është krejtësisht e vetme në panoramën ndërkombëtare. Në Premier League, për shembull, sot kryeson Erling Haaland me 14 gola, duke e tërhequr Manchester City përpara. Në La Liga spanjolle është Kylian Mbappé me 13 gola në krye; edhe pse francezi i Real Madridit nuk llogaritet sulmues “tradicional”. Pas tij vjen një qendërsulmues i pastër si Lewandowski (8 gola).
Në Gjermani, Harry Kane ka shënuar 14 gola, duke qenë golashënuesi më i mirë aktual. Në Ligue 1 franceze kryeson Mason Greenwood me 10 gola, edhe pse anglezi i OM nuk i bind puritanët e rolit “9”. Pas tij janë 9 golat e Joaquin Panichelli, talenti i Strasburgut që pëlqehet nga Milani. Jo rastësisht, një nga skuadrat që ka një lojtar më pranë konceptit të qendërsulmuesit, meksikani Santi Gimenez, është ende zero gola në kampionat.
