Sa vite kanë kaluar që kur ka luajtur për herë të fundit në një fushë futbolli Vítor Borba Ferreira Gomes, më i njohur si Rivaldo, i cili ka mbrojtur ngjyrat e Barcelonës midis viteve 1997 dhe 2002? Shumë vite. Në një edicion të ri të programit “Fala Rivaldo”, ish-futbollisti ka rikujtuar disa momente ikonike gjatë karrierës.

“Topi i Artë” i vitit 1999 është ndalur tek njëri nga futbollistët që ka lënë më shumë shenjë në kampionatin spanjoll, Luis Figo, i cili ishte te Barcelona në vitin 1995 dhe më pas i tradhëtoi katalanasit me kalimin e tij te Real Madridi më 2000:

“Figo ka qenë gjithmonë një person i madh. Ai është edhe sot si një vëlla për mua. Ishte dhimbje e madhe largimi i tij nga Barcelona për te Real Madridi, sepse luanim bashkë në sulmin e Barcelonës. Pra, e ndanim përgjegjësinë. Ishte një lojtar i jashtëzakonshëm, që na jepte shumë besim dhe qetësi kur topi binte në këmbët e tij. Ishte një njeri i fortë, që dilte përpara çdo gjëje”.

Rivaldo vazhdoi: “Kur luanim kundër Real Madridit, i shkaktonte probleme Roberto Carlosit. Edhe në disa ndeshje të tjera të mëdha, gjithashtu, dallohej mbi të tjerët. I ndodhte rrallë të luante keq. Pastaj ai u bë një lojtar që kishte zakon të shënonte, realizoi shumë gola te Barcelona. Më pas kaloi te Real Madridi, shënoi edhe atje. Fitoi ‘Topin e Artë’ dhe ishte më i miri në botë. E dua shumë, sepse Figo nuk ka ndryshuar. Është po ai person që ka qenë që kur luaja me të”.

Sa i përket kalimit të Figos në “Santiago Bernabéu”, braziliani kujton: “Ishte një moment i vështirë për mua dhe të gjithë lojtarët e Barcelonës, sepse bazoheshim shumë tek ai. Krejt papritur erdhi kalimi i tij te Real Madridi. Jeta shkon përpara, ai arriti të bëhej më i miri në botë dhe fitoi ‘Topin e Artë’. Unë e inkurajova sepse është një person i madh, që më ka ndihmuar shumë kur mbërrita te Barcelona nga Deportivo La Coruña”.