Në “Selman Stërmasi”, Tirana u përballë me Teutën, në kuadër të javës së 25-të në Abissnet Superiore. Durrësakët fitojnë 0-1 falë një penalltie në minutat e fundit të takimit, për prekje të topit me dorë brenda zonës.
Pjesa e parë ishte e vakët dhe pa shumë raste për të dy ekipet. Në minutën e 68-të, Teuta kishte një shans të artë për të gjetur golin, por Ergis Arifi gabon edhe pse ishte i vetëm përballë Visar Bekaj.
Në minutën e 82-të, një top i futur në zonë nga Grei Kuqi, ndalet me dorë nga mesfushori i Tiranës, Kleandro Lleshi. Pas disa minutash dhe pasi pa pamjet në VAR, arbitri kryesor i ndeshjes Kreshnik Cjapi, jep penallti për durrësakët. Godet Xhoel Mcolli, topi përfundon në rrjetë.
Rezultati nuk ndryshon deri në fund. Teuta fiton 0-1 dhe renditet në vendin e 6-të me 33 pikë, 3 pikë më pak se Dinamo e vendit të 4-të. Tirana mbetet në vendin e 9-të me 21 pikë.
