Paul Pogba po buzëqesh sërish. Kampioni i botës me Francën më 2018 dhe një nga figurat më të mëdha të futbollit francez në dekadën e fundit, dha një intervistë për “MARCA” në Nju Jork, në prag të debutimit të “Les Bleus” në Kupën e Botës. Pas një prej periudhave më të vështira të karrierës së tij dhe rikthimit në fushë këtë vit, Pogba e sheh Francën si favoriten kryesore për titullin.
Franca, favorite për Kupën e Botës?
Qartësisht është favorite e këtij Botërori. Natyrisht, bashkë me kombëtare të mëdha si Spanja, Gjermania apo Brazili. Ne e dimë se nuk janë vetëm talenti apo lojtarët që të bëjnë të fitosh, por i gjithë grupi.
A është kjo Francë më e fortë se ajo që fitoi Botërorin më 2018?
Po. Mendoj se kjo skuadër është shumë më e mirë tani. Ka më shumë cilësi se ne. Kishim një kombëtare fantastike, me lojtarë shumë të mirë. Kishim një Kylian më të ri. Tani janë lojtarë me përvojë dhe ka të rinj si Doué, Olise apo Cherki që mund të bëjnë diferencën. Kjo Francë ka më shumë lojtarë cilësorë.
A do të kishte frikë çdo kombëtare të përballej me Francën?
Po, është e vërtetë. Individualisht mendoj se Franca është skuadra më e fortë e këtij Botërori. Jemi favoritët dhe do të fitojmë.
Franca është skuadra që të gjithë duan ta mundin. Çfarë do të thotë kjo?
Po, sigurisht, por e dimë që nuk është kaq e thjeshtë. Do të jetë shumë e vështirë. Të luash kundër Francës është gjithmonë diçka më shumë, diçka e veçantë. Të gjithë duan ta mundin Francën.
Cila është forca më e madhe e Didier Deschamps?
Për të fituar nuk mjafton një lojtar apo një tjetër, por i gjithë ekipi. Flasim vetëm për sulmin, por duhet edhe të mbrohemi. Na duhen mesfushorë të fortë, mbrojtje e fortë dhe portier i fortë. Të gjithë janë të rëndësishëm dhe do të bëjnë diferencën në një moment. E rëndësishme është të fitosh.
A ka shumë presion mbi Kylian Mbappé?
Që kur ishte 17 vjeç, presioni ka qenë aty. Sa më shumë rritesh, aq më shumë presion ke. Mund të jetë një presion pozitiv, mendoj se për të është pozitiv. Ai është një lojtar i madh. Pavarësisht nëse dikujt i pëlqen apo jo, është një lojtar i madh. Duhet ta ndihmojë skuadrën të fitojë.
Dhe ky presion do ta ndjekë gjithmonë?
Nuk mendoj se do të zhduket ndonjëherë. Kur je një lojtar i madh, gjithmonë ke presion. Kur luan një ndeshje të madhe, është normale. Kur luan keq ose mesatarisht, do të kritikohesh. Kështu është. Ka gjithmonë shumë ndeshje dhe duhet t’i harrosh. Ai i harron gjithmonë, prandaj shënon kaq shumë gola. Nëse do ta prekte mendërisht, nuk do të mund të ishte kaq i fortë gjatë gjithë vitit.
Nëse do të zgjidhje një francez nga cilido brez për këtë Botëror, cilin do të merrje?
Zinedine Zidane. Sepse Zidane është… Në çdo brez, mendoj se mund të luajë dhe ta ndihmojë skuadrën.
A i vendos ndonjë çmim fanellës së firmosur nga Zidane?
Do të ishte shumë, shumë e shtrenjtë. Kam dy të tilla. Njëra është jashtëzakonisht e vlefshme. Nëse dikush do të më dërgojë një mesazh… Por jo, jo. Është vetëm për mua. Ne u rritëm duke parë Zizou. E kam njohur, kemi bërë gjëra bashkë me ‘Adidas’ dhe për mua është shumë e rëndësishme ta kem fanellën e tij.
E imagjinon veten sërish me Francën?
Po, sigurisht. Dua të luaj sërish, të jem mirë fizikisht dhe të ndihmoj ekipin tim. Nëse jam mirë dhe luaj mirë, do të rikthehem.
