Claudia Rodríguez, partnerja e Marc Cucurella, festoi në rrjetet sociale transferimin e tij te Real Madridi. Influencuesja e njohur, e cila është gjithashtu stiliste mode dhe balerinë, publikoi një mesazh lamtumire për Chelsea, të shoqëruar me një fotografi të saj nga fëmijëria e veshur me fanellën e Real Madridit. Claudia, e cila më parë kishte pranuar hapur se ishte tifoze e madrilenëve, u shpreh qartë: “Po shpërthej nga lumturia dhe krenaria, le të nisë aventura”.

Ja mesazhi i plotë i Claudia Rodríguez: “Nuk di si t’i them lamtumirë shtëpisë sime. Faleminderit të gjithëve që kanë qenë pjesë e kësaj eksperience; ndihem shumë me fat për gjithçka që kemi ndarë gjatë këtyre viteve. Erdha me dy foshnja dhe po largohem me dy djem të vegjël dhe një vajzë britanike. Nuk e di si do t’ua shpjegoj atyre se Chelsea nuk është më pjesë e jetës sonë.

Gjithçka që kemi përjetuar gjatë këtyre viteve ka qenë një eksperiencë plot mësime; kemi kaluar çdo lloj sfide, por mbi të gjitha e kemi shijuar këtë udhëtim. Faleminderit të gjithëve që kanë qenë pjesë e këtij kapitulli të jetës sonë, faleminderit vajzave të mia, të cilat do të më mungojnë shumë! Faleminderit çdo ‘Blue’ që kam njohur! Ju uroj më të mirat; Londra do të jetë ‘Blue’ gjithmonë”.

Marc dhe Claudia janë prindër të tre fëmijëve: Mateo, Río dhe Bella, të lindur respektivisht në vitet 2019, 2021 dhe 2023. Çifti ka folur hapur për diagnozën e Çrregullimit të Spektrit të Autizmit (ÇSA) të djalit të tyre të madh, duke ndarë përditshmërinë e tyre me natyrshmëri dhe ndihmuar në rritjen e ndërgjegjësimit për sfidat me të cilat përballen familjet në situata të ngjashme.

Në një intervistë për kanalin YouTube “La Media Inglesa”, Cucurella tha: “Ka anën e vet negative, gjithçka kërkon më shumë përpjekje, gjithçka është më e vështirë. Po ashtu ka anën e mirë: kur arrin diçka, qoftë edhe një përparim të vogël, kënaqësia është shumë më e madhe”.