Phil Foden i ka lodhur fqinjët e tij, të cilët pak ditë më parë kanë lajmëruar policinë për të ndërhyrë, për të qetësuar dhe mbi të gjitha për të ulur zërin e muzikës, gjatë festës që po zhvillohej te vila e mesfushorit të Manchester City.

Një festë që zgjati deri në orët e vona të natës në vilën luksoze të lojtarit kampion në Premier League. Kjo ngjarje u raportua sot nga tabloidi britanik “The Sun”, i cili më pas shpjegon se si banorët u thanë oficerëve të policisë se jeta e tyre është bërë një ferr i gjallë që kur Foden u zhvendos pranë tyre.

Akuzat e fqinjëve flasin për muzikë rap që luhej me zë të lartë deri në orët e vona të mbrëmjes dhe më pas për një Doberman, qenin e tij roje në vilë, që lehte gjithë ditën.

Policia e Cheshire tha se kishte marrë një ankesë për festën, por u kërkoi fqinjëve të kontaktonin këshillin e tyre lokal bashkiak. Për pasojë, në një letër të hapur, banorët e rrugës së tij në Prestbury e quajtën atë “egoist” dhe i kërkuan Bashkisë që të ndërhynte.