Liverpool dhe Manchester City janë vendosur në gatishmëri të lartë pasi trajneri i skuadrës së Wolves, Gary O’Neil bëri një deklaratë interesante në konferencë për shtyp.
Ai pretendoi se klubi mund të detyrohet të shesë asetet e tyre të çmuara në merkaton e verës për të mbajtur financat e klubit në këmbë.
Wolves aktualisht janë në vendin e 13-të në renditjen e Premier League dhe e kanë shmangur me siguri rënien nga kategoria për sezonin 2023-24. Megjithatë, një eksod masiv i lojtarëve nga “Molineux” pritet në merkaton e verës.
Që kur Premier League filloi të ndëshkonte shkeljet e fair play-t financiar klubet kanë qenë më të matur me aktivitetet e tyre fiskale.
Skuadrave si Everton dhe Nottingham Forest tashmë u janë hequr pikë këtë sezon.
Ujqërit do të kërkojnë të fitojnë para nga yjet e tyre të rinj gjatë verës. Anësori portugez Pedro Neto është lidhur me Manchester Cityn dhe Liverpoolin, me klubin që e vlerëson atë në 60 milionë sterlina.
Mbrojtësi i majtë algjerian Rayan Ait-Nouri gjithashtu është përfolur për një lëvizje te Liverpool dhe City, me Wolves që e vlerësojnë atë në 50 milionë sterlina.
Në konferencën për shtyp para ndeshjes së Wolves kundër Crystal Palace, O’Neil pohoi:
“Unë nuk mendoj se do të kemi para në dispozicion pa shitur një lojtar. Klubi pret në një të ardhme të parashikueshme të financojë veten. Por këto gjëra mund të ndryshojnë. Nuk do të prisja të ishte një verë ku ne shpenzojmë shumë miliona”.
