Real Madrid po ndjek një strategji të re në komunikimin publik për dëmtimet e lojtarëve.

Rasti i fundit është Kylian Mbappe. Në njoftimet zyrtare për mediat, klubi madrilen ka vendosur që t’i “mashtrojë” gazetarët duke i bërë dëmtimet më alarmante, pra duke shkruar një kohë rikuperimi më të gjatë nga sa është në të vërtet.

Këto periudha rikuperimi janë qëllimisht më të gjata se koha që mjekët e Realit besojnë se u duhet lojtarëve. Kjo bëhet për disa arsye. E para, shpërqendron kundërshtarët. E dyta, i jep kohë stafit që, në raste kur gjërat nuk shkojnë mirë, të jenë në rregull me njoftimet e tyre paraprake. Së treti, motivon lojtarët për t’u shfaqur si lojtarë që nuk kanë probleme rikuperimi dhe kthehen shpejt në fushë.

Real Madrid ka një departament mjekësor të nivelit të lartë. Me këtë strategji, klubi i “shet” rikuperimet e shpejta të lojtarëve si suksese të lojtarëve, por edhe të ekipit mjekësor.