Fitorja 2-1 ndaj Brighton në javën e parafundit në Premier Leaue ka ngjitur skuadrën e Chelsea në vendin e gjashtë në klasifikim. Duket se më në fund “blues” po gjejnë ritmin e munguar, duke qenë pranë kualifimit në Conference League sezonin e ardhshëm.
“Merita të plota për lojtarët, ata e merituan plotësisht fitoren. Kjo na lejon të ëndërrojmë të luajmë në Europë sezonin e ardhshëm. Duhet të ruajmë mentalitetin tonë për të fituar. Më e rëndësishmja është besimi dhe performanca”, tha trajneri i Chelsea, Mauricio Pochettino.
Më tej, argjentinasi vijoi: “Paraqitjet dhe rezultatet janë vërtet të mira kohët e fundit. Mendoj se paraqitjet tona kanë qenë të mira që në fillim të sezonit, por asokohe rezultati nuk përputhej me lojën tonë. Jemi shumë krenarë dhe të lumtur. Evolucioni i ekipit është aty”.
Në lidhje me përdorimin e VAR në të ardhmen, që dje ndëshkoi James me të kuq, Pochettino tha: “Nuk mund të ankohemi, në fund morrëm tre pikë. Duhet të ecim përpara dhe të shohim nëse sezonin e ardhshëm mund të përmirësojmë mënyrën se si e përdorim VAR. Ka të bëjë me përmirësimin e mënyrës se si e përdorim atë”.
