Trajneri i Chelsea, Enzo Maresca, ka deklaruar se është i lumtur me pozicionin që ka skuadra e tij para këtij pushimi  të nëntorit. Skuadra e tij mori një barazim të rëndësishëm ndaj Arsenal ditën e diel në Premier League, duke shkuar në vendin e tretë në Premier League.

“Është bukur të kesh një pushim ndërkombëtar pas kësaj periudhe të vështirë e plot me ndeshje, të rikuperosh energjinë dhe të rikthehesh përsëri. Sigurisht që ne jemi të kënaqur me vendin ku jemi tani, veçanërisht sepse kemi luajtur në mënyrën si duam të luajmë dhe kjo është gjëja më e rëndësishme”, tha Maresca.

Trajneri italian nuk bën parashikime në lidhje me pozicionin që mund të ketë skuadra në fund të Premier League: “Ne nuk po mendojmë se ku jemi në maj, është shumë larg. Sigurisht që do të doja të fitoja sa më shumë, por unë dhe skuadra jemi në fillimin e rrugëtimit tonë ndaj ekipeve që kanë vite që punojnë me një trajner”.

“Në Premier League është e rëndësishme, por edhe e vështirë të fitosh kundër çdo skuadre. Gjithsesi, gjëja e mirë është se ne jemi atje duke rivalizuar me çdo skuadër dhe nuk mund të shihni një ndryshim të madh kur luajmë këto lloj ndeshjesh ndaj ekipeve të mëdha. Kjo më jep besim”, tha Enzo Maresca.